Համաձայն ՀՀ ԿԲ տեղեկագիր ամսական պարբերականի, 2009 թվականի առաջին կիսամյակում ՀՀ ռեզիդենտ չհանդիսացող անձանցից ներգրավված ավանդագումարի ծավալը գերազանցում է 2008 թվականի համանուն ցուցանիշը 80,3 տոկոսով:
2009 թվականի առաջին կիսամյակում ՀՀ առևտրային բանկերը ՀՀ ռեզիդենտ չհանդիսացող անձանցից հավաքագրել են 627 413 մլն ՀՀ դրամ ավանդ, որի 92,9 տոկոսը կազմում են արտարժույթով, իսկ 7,1 տոկոսը` ՀՀ դրամով ներդրված ավանդները:
Վերոնշյալ ավանդագումարը չի ներառում կուտակային տոկոսները, ոչ ռեզիդենտ ձեռնարկությունների, տնային տնտեսությունների, շահույթ չհետապնդող կազմակերպությունների և ոչ բանկ ֆինանսական կազմակերպությունների ցպահանջ (ներառյալ հաշիվները) և ժամկետային ավանդները:
Վերլուծության արդյունքները ցույց են տալիս, որ ոչ ռեզիդենտներից ներգրաված ավանդագումարի ընդհանուր ծավալում դրամային ավանդների տեսակարար կշիռը նախորդ տարվա նույն ժամանակահատվածի համեմատությամբ նվազել է 14,2 տոկոսային կետով` չնայած, որ 2004 թվականին ՀՀ-ում ընդունված և 2005 թվականի հուլիսի 1-ից ուժի մեջ մտած «Ֆիզիկական անձանց բանկային ավանդների հատուցումը երաշխավորելու մասին» ՀՀ օրենքը երաշխավորում է ֆիզիկական անձանց դրամային ավանդները 2 մլն դրամի, իսկ արտարժութային ավանդները` ընդամենը 1 մլն դրամի չափով:
Գծապատկերում ներկայացված են ՀՀ առևտրային բանկերի կողմից 2009 թվականի հունվարից հունիս ամիսների ընթացքում ներգրավված ավանդները մլն ՀՀ դրամով
Դիտարկման ենթարկված ժամանակահատվածում ավանդների ներգրավման նվազագույն չափը գրանցվել է հունվար, իսկ առավելագույն չափը` հունիս ամիսներին: 2009 թվականի հունվար ամսին հավաքագրվել է 84 661 մլն ՀՀ դրամ ավանդ, որից դրամային ավանդները կազմել են 11,4 տոկոսը: Հունիս ամսին ՀՀ առևտրային բանկերը հավաքագրել են 126 677 մլն ՀՀ դրամ ավանդ: Հունիսն դրամային ավանդները կազմել են ընդհանուրի ընդամենը 6,1 տոկոսը:
Հեղինակ՝ Անուշ Պարսամյան
