/VTB.am/ 2009թ. օգոստոսի 31-ին, 2009-2010թ. նոր ուսումնական տարվա նախաշեմին, Նովոստի միջազգային մամլո կենտրոնում տեղի ունեցավ ՎՏԲ -Հայաստան Բանկ ՓԲԸ (VTB) գլխավոր տնօրեն-տնօրինության նախագահ Վալերի Օվսյաննիկովի և Այբ Կրթական հիմնադրամի տնօրեն Դավիդ Սահակյանի համատեղ մամլո ասուլիսը Հայաստանից Կենգուրու 2009 միջազգային մաթեմատիկական մրցույթի 3 հաղթողների մասնակցությամբ` Էռնա Պետրոսյան (ք. Մարտունի), Արմինե Հովհաննիսյան (ք. Երևան) և Հայկ Տեփանյան (ք. Երևան):
Մամլո ասուլիսի սկզբին Վ. Օվսյաննիկովը և Դ. Սահակյանը ջերմորեն ողջունեցին Հայաստանի, Ռուսաստանի և ողջ աշխարհի դպրոցականներին նոր ուսումնական տարվա և Գիտելիքների միջազգային օրվա սեպտեմբերի 1 առթիվ, մաղթեցին նրանց երջանիկ և խաղաղ մանկություն, քաջ տրամադրություն, նորանոր հաջողություններ ուսման մեջ, գերազանց գնահատականներ, նոր ձեռքբերումներ և հաղթանակներ, այդ թվում Կենգուրու 2010 գալիք մրցույթում:
Մամլո ասուլիսի շրջանակներում տեղի ունեցավ մրցույթի երեք հաղթողներին մրցանակների հանձնման արարողությունը, որի ընթացքում Վալերի Օվսյաննիկովը Էռնա Պետրոսյանին, Արմինե Հովհաննիսյանին և Հայկ Տեփանյանին հանձնեց ՎՏԲ – Մանկություն ավանդային պայմանագրեր` համապատասխան 500.000 դրամ, 250.000 դրամ և 250.000 դրամ գումարի չափով:
Դրա հետ մեկտեղ ԶԼՄ ներկայացուցիչների համար կազմակերպվել էր Բանկի նոր պրոդուկտի` ՎՏԲ -Մանկություն ժամկետային ավանդի շնորհանդես, ինչպես նաև տրամադրվել է տեղեկատվություն Բանկի կողմից իրականացվող հովանավորչական և բարեգործական ծրագրերի մասին:
Իր հերթին, Այբ Կրթական հիմնադրամը թղթակիցներին տրամադրեց տեղեկություն Հայաստանում Կենգուրու 2010 հերթական մաթեմատիկական մրցույթի անցկացման ժամկետների և կարգի մասին: Միաժամանակ նշվեց, որ այս տարի մարտի 19-ին Հայաստանում առաջին անգամ անցկացվեց Կենգուրու միջազգային մաթեմատիկական մրցույթը, որին մասնակցեցին աննախադեպ թվով դպրոցականներ` 30.567, զարկ տալով մի նոր մաթեմատիկական մանկական շարժմանը: Մրցույթի կազմակերպիչ Այբ կրթական հիմնադրամը արդեն նախապատրաստվում է Կենգուրու 2010-ին: Նախատեսվում է մրցույթի աշխարհագրական սահմանների ընդլայնում` ներգրավվելով նաև դպրոցներ Արցախից և Ջավախքից:
