Հայտնի է, որ 2006 թվականի պետական բյուջեի մասին օրենքի համաձայն կազմվել է նախկին ԽՍՀՄ Խնայբանկում հայաստանցիների ունեցած ավանդների փոխհատուցման մասին ծրագիր: Վճարումը սկսվել է 2006 թվականի օգոստոսից և շարունակվում է առայսօր։ Ըստ այդ ծրագրի, ավանդի փոխհատուցում ստանալու իրավունք ունեն 2005 թվականի հուլիսի մեկից մինչեւ 2006 թվականի ապրիլի մեկն ընկած ժամանակահատվածում անընդմեջ ընտանեկան նպաստի իրավունք ունեցող ընտանիքների կազմում ընդգրկված «Հայխնայբանկ» ՓԲԸ ավանդատու հանդիսացող քաղաքացիները:

Նշենք, որ փոխհատուցում տրվում է այն անձանց, որոնք, ըստ առաջնահերթության, 70 տարին լրացած և դրանից բարձր տարիքի կենսաթոշակառուներ են, միայնակ կենսաթոշակառուներ, Հայրենական մեծ պատերազմի մասնակիցներ, ՀՀ պաշտպանության 1990-1994 թվականների ընթացքում մարտական գործողություններին մասնակցած, հաշմանդամ դարձած անձինք և նրանց ընտանիքների անդամներ։

2006 թվականից սկսած ավանդների փոխհատուցման ցուցակում ընդգրկված է եղել շուրջ 62 հազար քաղաքացի և այս տարվա ապրիլ ամսվա դրությամբ 21 հազար 144 մարդ փոխհատուցումն արդեն ստացել է: 2006-2009 թվականներին ավանդների փոխհատուցման ծրագրին հատկացվել է շուրջ 4,9 մլրդ դրամ: 2006 թվականին և 2007 թվականին պետական բյուջեից տրամադրվել է մեկական միլիարդ դրամ։ 2008 թվականին այդ թիվը հասել է 1,3 մլրդ–ի, իսկ 2009 թվականին պետական բյուջեի նախագծում ներկայացվում է 1,6 մլրդ։

Համաձայն ավանդների փոխհատուցման մասին օրենքի` փոխհատուցում ստանալու ավանդատուի պահանջի իրավունքը համարվում է անձի հետ անխզելիորեն կապված իրավունք, և, որպես սոցիալական աջակցություն, վերապահվում է միայն տվյալ քաղաքացուն: Վերոհիշյալ իրավունքը չի կարող անցնել այլ անձի, լինել գրավի առարկա, մտնել ժառանգության զանգվածի մեջ:

Ինֆորմացիան հավաքագրված է http://www.hhpress.am/, http://www.tert.am/, http://www.168.am/, http://new.aravot.am/ կայքերից:

Անուշ Պարսամյան

Դուք կարող եք հետևել այս նութին վերաբերվող կարծիքներին RSS 2.0–ի միջոցով։
Դուք կարող էք թողնել պատասխան, կամ հետեվել պատասխաններին ձեր իսկ կայքից.